(7) 2. สุขวคฺโค

[65] ‘‘ทฺเวมานิ , ภิกฺขเว, สุขานิฯ กตมานิ ทฺเว? คิหิสุขญฺจ ปพฺพชิตสุขญฺจฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ ปพฺพชิตสุข’’นฺติฯ

[66] ‘‘ทฺเวมานิ, ภิกฺขเว, สุขานิฯ กตมานิ ทฺเว? กามสุขญฺจ เนกฺขมฺมสุขญฺจฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ เนกฺขมฺมสุข’’นฺติฯ

[67] ‘‘ทฺเวมานิ, ภิกฺขเว, สุขานิฯ กตมานิ ทฺเว? อุปธิสุขญฺจ นิรุปธิสุขญฺจฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ นิรุปธิสุข’’นฺติฯ

[68] ‘‘ทฺเวมานิ, ภิกฺขเว, สุขานิฯ กตมานิ ทฺเว? สาสวสุขญฺจ อนาสวสุขญฺจฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ อนาสวสุข’’นฺติฯ

[69] ‘‘ทฺเวมานิ, ภิกฺขเว, สุขานิฯ กตมานิ ทฺเว? สามิสญฺจ สุขํ นิรามิสญฺจ สุขํฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ นิรามิสํ สุข’’นฺติฯ

[70] ‘‘ทฺเวมานิ, ภิกฺขเว, สุขานิฯ กตมานิ ทฺเว? อริยสุขญฺจ อนริยสุขญฺจฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ อริยสุข’’นฺติฯ

[71] ‘‘ทฺเวมานิ , ภิกฺขเว, สุขานิฯ กตมานิ ทฺเว? กายิกญฺจ สุขํ เจตสิกญฺจ สุขํฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ เจตสิกํ สุข’’นฺติฯ

[72] ‘‘ทฺเวมานิ, ภิกฺขเว, สุขานิฯ กตมานิ ทฺเว? สปฺปีติกญฺจ สุขํ นิปฺปีติกญฺจ สุขํฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ นิปฺปีติกํ สุข’’นฺติฯ

[73] ‘‘ทฺเวมานิ, ภิกฺขเว, สุขานิฯ กตมานิ ทฺเว? สาตสุขญฺจ อุเปกฺขาสุขญฺจ ฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ อุเปกฺขาสุข’’นฺติฯ

[74] ‘‘ทฺเวมานิ , ภิกฺขเว, สุขานิฯ กตมานิ ทฺเว? สมาธิสุขญฺจ อสมาธิสุขญฺจฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ สมาธิสุข’’นฺติฯ

[75] ‘‘ทฺเวมานิ, ภิกฺขเว, สุขานิฯ กตมานิ ทฺเว? สปฺปีติการมฺมณญฺจ สุขํ นิปฺปีติการมฺมณญฺจ สุขํฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ นิปฺปีติการมฺมณํ สุข’’นฺติฯ

[76] ‘‘ทฺเวมานิ, ภิกฺขเว, สุขานิฯ กตมานิ ทฺเว? สาตารมฺมณญฺจ สุขํ อุเปกฺขารมฺมณญฺจ สุขํฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ อุเปกฺขารมฺมณํ สุข’’นฺติฯ

[77] ‘‘ทฺเวมานิ, ภิกฺขเว, สุขานิฯ กตมานิ ทฺเว? รูปารมฺมณญฺจ สุขํ อรูปารมฺมณญฺจ สุขํฯ อิมานิ โข, ภิกฺขเว, ทฺเว สุขานิฯ เอตทคฺคํ, ภิกฺขเว, อิเมสํ ทฺวินฺนํ สุขานํ ยทิทํ อรูปารมฺมณํ สุข’’นฺติฯ

สุขวคฺโค ทุติโยฯ

(8) 3. สนิมิตฺตวคฺโค

[78] ‘‘สนิมิตฺตา , ภิกฺขเว, อุปฺปชฺชนฺติ ปาปกา อกุสลา ธมฺมา, โน อนิมิตฺตาฯ ตสฺเสว นิมิตฺตสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

[79] ‘‘สนิทานา, ภิกฺขเว, อุปฺปชฺชนฺติ ปาปกา อกุสลา ธมฺมา, โน อนิทานาฯ ตสฺเสว นิทานสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

[80] ‘‘สเหตุกา, ภิกฺขเว, อุปฺปชฺชนฺติ ปาปกา อกุสลา ธมฺมา, โน อเหตุกาฯ ตสฺเสว เหตุสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

[81] ‘‘สสงฺขารา, ภิกฺขเว, อุปฺปชฺชนฺติ ปาปกา อกุสลา ธมฺมา, โน อสงฺขาราฯ เตสํเยว สงฺขารานํ ปหานา เอวํ เต ปาปกา อกุสลา ธมฺมา น โหนฺตี’’ติฯ